Badehandkle og ei katterumpe

Som eg har nevnt tidlegare er denne bloggen eit samarbeid mellom meg (Ingrid) og Roald. Roald tek bileta, og så er det min jobb å finna nokre vakre poetiske ord å skriva om desse bileta. Å finna vakre, poetiske ord om eit badehandkle og ei katterumpe slit eg litt med.

Kanskje eg kan skriva litt om handkle? At her i huset har vi satt dette med fargerikt fellesskap ut i praksis når det gjeld handkle. Eg veit at det er vanleg å ha handkle som matchar med interiøret på badet, evt fargerike handkle(sjølvsagt alle i same farge) som livar opp på eit ellers kvitt og stilfullt bad. Heima hjå oss brukar vi handkle til å tørke oss med (!) og tenkjer ikkje så mykje over kva farge det er på handkledet eller om det er litt frynsete i kanten. Når det til slutt er hull i eit godt brukt handkle,vert det brukt til vaskefille ei stund før det endeleg endar sine dagar på Svartasmoget, hvis det er meir igjen av det.

Dette handkledet trur eg er kjøpt billig på Ikea, eller så kan det hende at det kom i posten, som gratispakke etter eit kjøp i Ellos eller HM... Uansett står det iallfall ikkje så veldig i stil med resten av badet...